La Seyne sur Mer

Accueil > Occitanisme : points de vue et reflets d’expérience > René Merle, "Tr’òc, Tribunas Rescòntres Occitanistas, pas mai !"

René Merle, "Tr’òc, Tribunas Rescòntres Occitanistas, pas mai !"

vendredi 10 avril 2020, par René MERLE


Tr’oc, numéro 0 - décembre 1990.
Me diretz que “tròc” es mens blos que “barat”, “cambi”, “escambi”. Mai se en francés “Troc” vou dire, (s’avem pas de moneda, o se volem pas se ne’n servir), “je te donne une chose, tu m’en donnes une”, es, en occitan, “ti doni ma causa, contra ta causa”. E “Causa” a dos sens, que li tenem, “chose” et “cause”.
Coma lei veritats desplegadas, la moneda es pas facha per lei gents, li tomba d’adaut. Empacha pas que se n’as siás quauqu’un, se n’as gès siás degun. Dins l’escambi “teoric” occitanista, si paga en moneda de “veritats desplegadas”. Mai, coma disiá l’autre, grisa mon amic es la teoria, mai verd, ben verd l’aubre de la vida. Escampilhats, sensa si veire, e meme si conoisser, siam un fum que despièi d’annadas fasem çò que podem per una causa fosca, baptisada per facilitat : occitanisme. E qu’avem en comun quauquei principis que delà lei causidas diversas (politicas, pedagogica, etc.) nos recampan, e de còps nos fan frairejar. Que per n’autrei (ambe tant d’autrei) l’occitanisme es un plaser sanís, e per aquò una aisina per viure dins aquesta societat d’alienacion, e bessai per ajudar a la cambiar. Que l’occitanisme es simptòma d’una manca, e que per aquò nos buta a l’escota de la creacion culturala tota. Que l’occitanisme es un rescòntre, monte l’a gès de caps ni mai de mèstres.
Aara se voletz, si passarem dins nòstre escambi de la moneda dei veritats occitanistas desplegadas, pas mai aquela dei profetas isolats e decebuts qu’aquela deis burèus executius. Aquò vou pas dire que si passarem de principis, ni mai d’ideologias que n’avem de besonh, mai que mai. Nacionalisme, França, Europa, lucha dei classas, populisme, acculturacion, pedagogia... Mai es que la veritat deu principis e deis ideologias ven pas, per cadu, de seis experiénçias, sei desirs, etc. ? Siam de bricolurs, cadun dins son trauc, dins son ròdol, e farem de nòstre bricolatge la nòstra tòca. Es bessai utile de si faire passar, coma lo furet de la cançon (francesa) la tòca de nòstrei pretzfachs.
Aquò dich sensa illusions. Si donam un an per veire s’aquò capita un pauc, senon farem pauseta.
Renat Merle

| | Plan du site | Suivre la vie du site RSS 2.0 | SPIP