« En 1892, quora dona a l’Armana de la Sartan son poèma « La Sociala », Clovis a ren d’un descaladaire temerari. Es un militant « possibilista » (encuei se diriá « reformista ») e un escrivan sociau combatiu e coneissut. Pasmens, podem pas dobtar de la sinceritat generosa, de l’esperança messianica, de l’òdi de classa que pòrta « La Sociala ». Es una sinceritat qu’a pas grand causa de veire ambé la delectation estetica davans la paraula « revolucionària » dau nervi, dau rufian, que podèm legir dins lo meme Armana. Ambé Clovis, es lo pòple immense dei trabalhaires que parla.
Rufe tèxte de combat que contrasta ambé lo gentum convenent de sa poesia felibrenca, « La Sociala » es pas jamais estada oblidada d’aquelei que desseparavan pas son engatjament sociau de son engatjament per la lenga dau bres. E pensi au Calen de Marselha per exemple. Es estada reviudada dins leis annadas 1960-1970 per l’òbra de Glaudi Barsotti, e ara, mai que jamai, adus son esperança de Républica democratica e sociala ai luchas d’encuei.

La soucialo

Cridan que sian de pantaiaire,
Que sabèn pas ço que voulèn,
Aquéli que, sènso rèn faire,
An la pocho e lou gavai plen !
Pèr leis arlèri,
Nouesto misèri
Dèu pas fini, faou que s’en counsoulèn.
Jésus va di
Au Paradis
L’amo doou paure un beou jour s’espandis ;
Mai nous an precha sa mouralo
Pèr nous mena coumo un troupeou.
S’un coou peto, lou fiò de Dieou,
La soustendren, la soucialo !

Nous cantan : “La fourtuno es facho
Emé lei susour doou travai !”
Soulamen lou pople si facho
Perqu’es eou que tiro lou fai.
Jaque, travaio
Pèr ta marmaio :
Au bout de l’an as pas dous soou de mai ;
Dins un trelus
Lei bèou Crésus
Si fan de joio emé li plour dei gus.
Lou drole a fre, la maire es palo :
Ounte soun passado lei fusiéu ?...
S’un coou peto, lou fiò de Dieou,
La soustendren, la soucialo !

Eron pamens tóuteis en aio,
Erian sei fraire, avien pas paou,
Quand venguerian ‘mé nouesto daio
Li meissoun de quatre vint-noou !
Zóu ! Sus la tèsto
Dei troblo-fèsto !
E lei bourgés pourtavon pas lou doou,
Es qu’a la fin
Que lei gourrin
Nous an vueja la mastro e lou petrin.
An pres la vigno segnouralo :
Avèn pas meme lou gaveou...
S’un coou peto, lou fiò de Dieou,
La soustendren, la soucialo !

Se lou pople qu’a fam s’auboro,
Lou pitre nus, lei pèd descaus,
Coumo s’escrasavon d’amour
Lou sang giscla sus lei caiau
Emé sus lei frumo,
La terro fumo
Lou rouge mounta i vèntre dei chivau
Sout nòuestrei rèi
Nous faou la lèi
Que soun l’esfrai doou souleou quand lei vèi,
Se ti sias escapa dei balo
La presoun t’enterro tout vieou...
S’un coou peto, lou fiò de Dieou,
La soustendren, la soucialo !

Dins lou tèms que l’escrutin bado,
Pèr agué lou pichoun papié,
Nous apellon sei cambarado,
Nàutrei que sian lei sènso-pies.
Plus de memòri !
Tout pèr sei glòri.
Quand l’avèn bèn daura, lou rastelié !
Jamai de traou
Ai capitaou,
Impausarian pus lèu leis esprita !
Nous escalon sus leis esquino
S’un coou peto, lou fiò de Dieou,
La soustendren, la soucialo !

Que pèr nous rousiga la pèu....
Sian bessai de pauro cervello,
Sian proun d’ignourènci ennebla :
Se manjan de regardello
L’avèn quaouquei fes pas voula !
A ço que briho
Vai la pauriho
Lei nouestre, au mens, sauvaren noueste blad ;
Mai nouestre su
Es tant pouchu
Qu’ai plebien preferen lei moussu
Es lou gros pèis que nous avalo,
E sian de soucis pèr eou...
S’un coou peto, lou fiò de Dieou,
La soustendren, la soucialo !

Lou niue ailamoundaut s’estrasso ;
Veiren leou poucheja l’uiau.
Zóu de foro lei curo-biasso !
Plus de mèstre ! Tóuteis egau.
Avès beou dire,
Nous fasès rire
Se nous prenès encar pèr de gournau !
Lou bru que sort
Dei sa plen d’or,
S’esvanira se sian tóutei d’acord,
Coumo lou cant d’uno cigalo,
Après lou darrié jour d’estieou...
S’un coou peto, lou fiò de Dieou,
La gardaren, la soucialo !

(Armana de la Sartan, 1892)